సినిమా థియేటర్ కు వెళ్దామనుకుంటున్నారా? అయితే ఈ విషయాలు మీకోసమే...

దూరాన్ని పాటించండి..

మీరు వెళ్లే థియేటర్లో కేవలం 50 శాతమే సీట్లను భర్తీ చేయాలని కేంద్ర ప్రభుత్వం స్పష్టమైన ఆదేశాలు జారీ చేసింది. కాబట్టి సినిమా హాలులోకి వెళ్లిన ప్రతి ఒక్కరూ ఒక సీటు నుండి మరొక సీటు గ్యాప్ ఉండేలా చూసుకోండి. అలాగే టికెట్లు తీసుకునే సమయంలో.. సినిమా గేటులో నుండి వెళ్లేటప్పుడు కూడా కనీసం రెండు అడుగుల దూరం పాటించాలి.

శానిటైజర్ వాడండి..

మీరు సినిమా చూడటానికి థియేటర్ లేదా మాల్‌కు వెళ్ళినప్పుడు మీతో శానిటైజర్ తీసుకెళ్లండి. థియేటర్‌లోని ఏదైనా ప్రాంతాన్ని తాకిన వెంటనే శానిటైజర్‌తో చేతులు కడుక్కోవాలి. అలాగే మీరు కూర్చునే సీటుపై కూడా శానిటైజ్ చేశారో చూసుకోండి.

ముక్కు లేదా కళ్ళను తాకవద్దు

థియేటర్‌లో చాలా మంది ఉపయోగించే ప్రాంతాన్ని తాకవద్దు. శానిటైజర్ వాడకుండా ముక్కు, ముఖం లేదా కళ్ళను అస్సలు తాకకండి. వీలైనంత వరకు ముఖాన్ని తాకడం మానుకోండి. ఎందుకంటే ఇలా చేయడం వల్ల కరోనా వేగంగా వ్యాపించే అవకాశం ఎక్కువగా ఉంది. కాబట్టి పొరపాటున కూడా ఇలాంటి తప్పులు చేయకండి.

మాస్క్ ధరించండి.

ప్రధానంగా థియేటర్‌కి వెళ్లేటప్పుడు మాస్కును తప్పనిసరిగా ధరించాలి. దీని వల్ల మీరు కరోనా బారిన పడకుండా ఉండేందుకు ఉపయోగపడుతుంది. థియేటర్లోకి మరియు హాలులోకి ప్రవేశించినప్పటి నుండి బయటకు వెళ్లే వరకు ఎట్టి పరిస్థితుల్లో మాస్కులను తీయకండి.

మీ స్మార్ట్ ఫోనులో

మీ స్మార్ట్ ఫోనులో ఆరోగ్య సేతు యాప్ ను డౌన్ లోడ్ చేసుకోండి. ఇదివరకే ఆ యాప్ ఉంటే దానిని అప్ డేట్ చేసుకోండి. ఎందుకంటే ఈ యాప్ లో కరోనా కేసులకు సంబంధించిన పూర్తి వివరాలు అందుబాటులో ఉండటమే కాదు.. మీ చుట్టుపక్కల ఎవరికైనా కరోనా లక్షణాలుంటే.. మిమ్మల్ని అలారమ్ ద్వారా అలర్ట్ చేస్తుంది. కాబట్టి ఈ యాప్ ను ఇన్ స్టాల్ చేసుకోవడం మాత్రం మరచిపోవద్దు.

సురక్షితమైన ఆహారం

సినిమా థియేటర్లలో ఇంటర్వెల్(విరామం) సమయంలో బయటకు వెళ్లడం సాధ్యమైనంత వరకు తగ్గించుకోండి. ఒకవేళ మీకు నిజంగా ఆకలిగా ఉంటే ఆన్ లైనులోనే ఆర్డర్ ఇవ్వండి. అలాగే మీరు తీసుకునే ఆహారాన్ని మరియు వాటర్ బాటిల్ ను జాగ్రత్తగా పరిశీలించి తీసుకోండి.

రోగలక్షణమైతే మానుకోండి

మీకు తేలికపాటి కరోనా లక్షణాలు ఉంటే, సినిమా చూడటానికి థియేటర్‌కు అస్సలు వెళ్లొద్దు. మరో మాటలో చెప్పాలంటే, తేలికపాటి లక్షణాలు ఉంటే, వెంటనే వైద్యుడిని సంప్రదించండి. దీని వల్ల మీరు త్వరగా కోలుకోవడమే కాదు.. ఇతరులకు ఇది వ్యాపించడకుండా ఉండేందుకు చాలా ఎక్కువగా సహాయపడుతుంది.