Garuda Puranam: గరుడ పురాణం ప్రకారం దురదృష్టాన్ని ఇలా అదృష్టంగా మార్చేసుకోవచ్చు

మన విధిని మనమే రాసుకోవడం:

మనమందరం జీవితంలో ఏదో సాధించడానికి ప్రయత్నాలు చేస్తుంటాం. కొందరు డబ్బు సంపాదించాలని, వ్యాపారం చేయాలని, రాజకీయంలో గెలుపొందాలని, క్రీడలో పతకం సాధించాలని కష్టపడుతుంటాం. అయితే అందులో ప్రతి ఒక్కరూ విజయం సాధించాలని ఏమీ లేదు. ఒక వ్యక్తి యొక్క విధి అతనికి చాలా సార్లు అనుకూలంగా ఉండకపోవడమే దీనికి కారణం. అటువంటి పరిస్థితుల్లో కర్మ చేయడం ద్వారా విధిని మార్చుకోవాలి.

మీరు జీవితంలో విజయం సాధించాలంటే, లక్ష్మీదేవి ఆశీస్సులు పొందాలంటే ముందుగా పరిశుభ్రత పట్ల శ్రద్ధ వహించడం నేర్చుకోవాలి. పరిశుభ్రతగా ఉన్న ఇంట్లో లక్ష్మీ దేవి నివాసం ఏర్పరచుకుంటుందని గరుడ పురాణంలో ఉంది.

పరిశుభ్రత అంటే ప్రదేశానికి, శరీరానికి సంబంధించినది. శరీరం, ఉండే ప్రాంతం శుభ్రంగా ఉంటే లక్ష్మీ దేవి ఆనందిస్తుంది. లక్ష్మీ దేవి కటాక్షం కోసం సిద్ధమవుతున్నప్పుడు స్నానం చేసి ఉతికిన బట్టలు వేసుకోవాలి. ఆ తర్వాత పూజ ప్రారంభించాలి. ఇంటిని కూడా పరిశుభ్రంగా ఉంచుకోవాలి. ఉదయం, సాయంత్రం వేళ ఇంటిని శుభ్రం చేసుకుంటే లక్ష్మీ దేవి ఆనందిస్తుంది.

దానధర్మాలు, సత్కార్యాలు:

దానధర్మాలు, సత్కార్యాలు చేయడం వల్ల మన విధిని మనం మార్చుకోవచ్చు. మంచి కర్మలు అంటే ఇతరులకు అందులోనూ ముఖ్యంగా అవసరం ఉన్నవారికి సాయం చేయడం వల్ల పుణ్యం వస్తుంది. ఆకలితో ఉన్న వారికి ఆహారం పెట్టడం, నిరాశ్రయులకు ఆశ్రయం కల్పించడం, అవసరమైన వారికి ఆర్థిక సహాయం అందించడం వంటి దయతో కూడిన చర్యలు చేస్తుండాలి.

అబద్ధాలు చెప్పొద్దు, దొంగలించొద్దు:

అబద్ధాలు చెప్పడం, దొంగతనం చేయడం పురాణాల ప్రకారం పాపకార్యాలు. ఎలాంటి పరిస్థితిలోనూ ఇతరులతో అబద్ధాలు చెప్పకూడదు. వేరొకరి వస్తువులను దొంగలించకూడదు. జీవితంలో నీతితో, నిజాయితీతో ఉండాలి. ఇతరుల పట్ల దయ చూపాలి. పెద్ద వారిని గౌరవించాలి. చిన్న వారిని ప్రేమించాలి. ఇతరులకు హాని కలిగించే చర్యలు చేయకూడదు. నిజాలు మాత్రమే చెప్పాలి.

వీటిని పాటించడం వల్ల దురదృష్ట జీవితాన్ని అదృష్టంగా మార్చుకోవచ్చని గరుడ పురాణం చెబుతోంది. భక్తి, దానం, సత్కార్యం, మంచి కర్మ, అబద్ధాలు చెప్పకపోవడం, దొంగలించకపోవడం, ఇతరుల పట్ల దయతో ఉండటం, గౌరవం ఇచ్చిపుచ్చుకోవడం వంటి వాటి వల్ల మంచి జరుగుతుందని పురాణాలు చెబుతున్నాయి.