తన బిడ్డ కోసం ఆ తల్లి చేసిన సాహసానికి సలామ్ చేయాల్సిందే... ఇంతకీ ఆమె ఏమి చేసిందంటే...

తల్లీ బిడ్డల ప్రేమ..

ఇటీవలే న్యూస్ ఛానెళ్లలో, సోషల్ మీడియాలో తల్లీకూతుళ్లకు సంబంధించిన ఓ వీడియో తెగ వైరల్ అయ్యింది. అందులో నర్సుగా పని చేస్తున్న తల్లిని చూడాలని తన కూతురు మారం చేయడంతో.. ఆ తండ్రి తన బిడ్డను సముదాయించలేక ఆమెను దూరం నుండి చూపిస్తాడు. అయితే, తన తల్లిని చూసిన వెంటనే ‘అమ్మా రా అమ్మ‘ అంటూ ఆ కూతురు రోధిస్తున్న తీరు అందరినీ కలిచివేసింది.

తెలంగాణ తల్లి..

అయితే తెలంగాణ రాష్ట్రంలో మాత్రం ఓ తల్లి తన కొడుకు కోసం తల్లడిల్లిపోయింది. కరోనా వైరస్ నేపథ్యంలో లాక్ డౌన్ విధించడంతో ఆమె బెంగ అంతా తన కొడుకు ఎలా ఉన్నాడో అని తరచుగా ఆవేదన చెందుతూ ఉండేది. ఇలా ప్రతిరోజూ ఆందోళన చెందుతూ కూర్చుంటే ఫలితం ఉండదని నిర్ణయించుకుంది.

అధికారులను కలిసి..

తన కొడుకు ఎక్కడ చిక్కుకున్నాడో.. తను ఎంతలా తల్లడిల్లుతున్నానో అనే విషయాన్ని పోలీసు ఉన్నతాధికారికి వివరించింది. అందుకు సానుకూలంగా స్పందించిన ఆ అధికారి ఆమెకు అనుమతి ఇచ్చారు.

700 కిలోమీటర్ల ప్రయాణం..

ఎట్టకేలకు అనుమతి తీసుకున్న రజియా భేగం అనే మహిళ స్కూటీపై సోమవారం 700 కిలోమీటర్ల దూరంలో నెల్లూరుకు పయనాన్ని ప్రారంభించింది. మరుసటి రోజు అంటే మంగళవారం నాడు క్షేమంగా కుమారుడి వద్దకు చేరుకుంది. అదే రోజు సాయంత్రం అదే స్కూటీపై సాయంత్రం మళ్లీ తన సొంతూరికి తిరుగు ప్రయాణాన్ని ప్రారంభించింది.

కొడుకును చూడాలనే తపన..

బుధవారం మధ్యాహ్నం తన సొంత ఊరికి చేరుకుంది. అనంతరం ఆమె విలేకరులతో మాట్లాడింది. ప్రభుత్వ టీచర్ గా పని చేస్తున్న తాను తన కొడుకును చూడాలనే తపనతోనే అంత దూరం ధైర్యంగా వెళ్లగలిగానని, తన కుమారుడిని క్షేమంగా తీసుకురాగలిగానని, అడవి ప్రాంతంలో వెళ్లినా కూడా తనకు ఎలాంటి భయం కలగలేదన్నారు. చాలా చోట్ల పోలీసులు ఆపారని, బోధన్ ఏసీపీ ఇచ్చిన ఉత్తరాన్ని చూపించడంతో వారు అనుమతించారని చెప్పింది. ఈ సందర్భంగా పోలీసులకు ధన్యవాదాలు కూడా తెలిపింది.

గత నెల్లూరుకు..

రజియా భేగానికి ఇద్దరు కుమారులు ఉన్నారు. వారిలో చిన్నవాడు మహమ్మద్ నిజాముద్దీన్. ఈ కుర్రాడు ఇటీవలే ఇంటర్ పూర్తి చేసుకుని హైదరాబాద్ నారాయణ మెడికల్ కాలేజీ అకాడమీలో కోచింగ్ తీసుకుంటున్నాడు. అయితే తన స్నేహితుడి తండ్రి ఆరోగ్యం బాగా లేదని తెలియడంతో, తనకు తోడుగా నెల్లూరు వెళ్లాడు. అయితే అదే సమయంలో కరోనా వైరస్ నేపథ్యంలో తొలుత జనతా కర్ఫ్యూ, తర్వాత లాక్ డౌన్ విధించడంతో నిజాముద్దీన్ అక్కడే చిక్కుకుపోయాడు.