చపాతీతో ఎగ్ రోల్స్.. ఇలా చేసుకుని తింటే రుచి అదిరిపోద్దంతే!

ఉదయాన్నే పిల్లలకు మంచి రుచికరమైన అల్పాహారం అందించాలంటే కాస్త ఎక్కువ సమయం పడుతుంది. అలాగే వారిని తినిపించడం కూడా ఒక సవాలుగా మారుతుంది. ఇడ్లీ, దోశ వంటివి వారికి నచ్చవు కూడా. అందుకే ఉదయం టిఫిన్‌తో పాటు మధ్యాహ్నం లంచ్‌లో కూడా పిల్లలు ఇష్టంగా తినే ఒక వంటకం గురించి ఈరోజు మీకు చెప్పబోతున్నాం. అదే ఎగ్ రోల్. దీనిని ఉదయం అల్పాహారంగా తినిపించొచ్చు. అలాగే మధ్యాహ్నం లంచ్ బాక్స్‌లో కూడా పెట్టి పంపించొచ్చు. ఆఫీసుకు వెళ్లే వాళ్ళు కూడా తొందరగా చేసుకోవాలంటే ఈ రెసిపీని ట్రై చేయవచ్చు.

ఇది చాలా రుచికరంగా ఉండడంతో పాటు తొందరగా చేసుకునేందుకుకే వీలుగా ఉంటుంది, అదే సమయంలో ఆరోగ్యాన్ని కూడా ఇస్తుంది. అయితే ఈ ఎగ్ రోల్‌ను ఎలా చేసుకోవాలి? దానికి కావాల్సిన పదార్థాలు ఏంటి? అనేది ఇక్కడ వివరించాము పూర్తిగా చదివి ట్రై చేయండి.

ఎగ్ రోల్ తయారీకి కావాల్సిన పదార్థాలు

1. చపాతీ
2. గుడ్డు
3. సన్నగా తరిగిన ఉల్లిపాయ
4. సన్నగా తరిగిన టొమాటో
5. కొత్తిమీర
6. కారం
7. గరం మసాలా
8. ధనియాల పొడి
9. నూనె
10. రుచికి తగినంత ఉప్పు
11. గరం మసాలా
12. అల్లం వెల్లుల్లి పేస్ట్
13. క్యాప్సికమ్

ఎగ్ రోల్ తయారీ విధానం

ముందుగా స్టవ్ ఆన్ చేసి కడాయి పెట్టుకోవాలి. అందులో కొంచెం నూనె పోసుకోవాలి. నూనె వేడయ్యాక అల్లం వెల్లుల్లి పేస్ట్ వేసుకోవాలి. ఆ పేస్ట్ ఒక 30 సెకండ్లు వేగాక అనులో చిన్న చిన్నగా కట్ చేసుకున్న క్యాప్సికం ముక్కలు, ఉల్లిపాయ తురుము వేసుకొని ఒక నిముషం పాటు ఫ్రై చేసుకోవాలి. ఆ తరువాత టమాటో కూడా జత చేసుకోవాలి. ఆ మిశ్రమంపై మూత పెట్టేసి ఒక మూడు నిమిషాల పాటు బాగా ఉడకనివ్వాలి.

మూడు నిమిషాల తరువాత అందులో కారం పొడి, ధనియాల పొడి, గరం మసాలా, రుచికి సరిపడా ఉప్పు వేసుకొని కలుపుకోవాలి. మసాలాలు అన్ని టమాటో, ఉల్లిపాయ, క్యాప్సికం ముక్కలకు బాగా పెట్టుకున్నాక అందులో కొంచెం నీళ్లు పోసుకోవాలి. ఆ మిశ్రమాన్ని బాగా ఉడికించుకోవాలి. అందులోని నీరు మొత్తం ఆవిరై మిశ్రమం ముద్దగా వచ్చేంత వరకు ఉడికించుకోవాలి. చివరగా కొత్తిమీర తరుగు వేసి.. స్టవ్ మీద నుంచి కడాయి దించుకుంటే ఎగ్ రోల్‌లో పెట్టాల్సిన కుర్మా రెడీ అయిపోతుంది.

ఇప్పుడు ముందుగానే చేసి పెట్టుకున్న చపాతీలు తీసుకోవాలి. ఒకవేళ మీకు వేడిగా కావాలనుకుంటే చపాతీలను ఓసారి వేడి చేసుకోవచ్చు. ఆ చపాతీల్లో కోడి గుడ్డును సగం చేసి ముక్కలు వేసుకోవాలి. అలాగే అందులోని కుర్మాను కూడా జత చేసుకోవాలి. ఆ మిశ్రమాన్ని రోల్ చేసుకొని ఒక రోల్ మాదిరిగా చేసుకోవాలి. ఒకవేళ కావాలనుకుంటే రోల్‌ను మరోసారి వేడి చేసుకోవచ్చు. ఆ తరువాత ఆ రోల్‌ను ఒక ప్లేట్‌లో తీసుకుంటే ఎగ్ రోల్ సిధమైనట్లే. దీనిని అల్లం చట్నీ లేదా కెచప్‌లతో తినొచ్చు.