ఒకే ఒక్క స్పూన్ నూనెతో హై ప్రొటీన్ బాయిల్డ్ ఎగ్ ఫ్రైడ్ రైస్..ఈజీగా చేసుకోండిలా..

రోజూ తినే అన్నం, కూరలతో విసుగొచ్చిందా? సాయంత్రం కాగానే ఏదైనా స్పైసీగా, రెస్టారెంట్ స్టైల్‌ లో తినాలనిపిస్తోందా? సాధారణంగా ఫ్రైడ్ రైస్ అనగానే నూనె ఎక్కువగా ఉంటుందని, ఆరోగ్యానికి మంచిది కాదని భయపడతారు.

కానీ కేవలం ఒకే ఒక్క టీస్పూన్ నూనెతో, అందులోనూ ప్రోటీన్ పుష్కలంగా ఉండే గుడ్డు తెల్లసొన ఉపయోగించి చేసే బాయిల్డ్ ఎగ్ ఫ్రైడ్ రైస్ రుచికి రుచిని, ఆరోగ్యానికి ఆరోగ్యాన్ని ఇస్తుంది. ముఖ్యంగా ఫిట్‌ నెస్ ఇష్టపడేవారికి, డైట్ చేసేవారికి ఇది బెస్ట్ ఆప్షన్.

బాయిల్డ్ ఎగ్ ఫ్రైడ్ రైస్ తయారీకి కావలసిన పదార్థాలు

నూనె - 1 టీస్పూన్
ఉడికించిన గుడ్ల తెల్లసొన - 4
పసుపు - 1 టీస్పూన్
కారం - 1 టేబుల్ స్పూన్
ఉప్పు - రుచికి తగినంత
గరం మసాలా - 1 టీస్పూన్
ఉల్లిపాయ - 1
వెల్లుల్లి రెబ్బలు - 10
పచ్చిమిర్చి - 2
వండిన బాస్మతి రైస్ - తగినంత
కొత్తిమీర - కొద్దిగా

ఎప్పుడైనా లాహోరీ పన్నీర్ కుర్మా టేస్ట్ చేశారా? నోట్లో పెట్టుకుంటే స్వర్గమే!

బాయిల్డ్ ఎగ్ ఫ్రైడ్ రైస్ తయారీ విధానం

స్టెప్ 1: ముందుగా ఉడికించిన 4 గుడ్లను తీసుకుని, వాటిలోని పచ్చసొనను పక్కకు తీసేయండి. కేవలం తెల్లసొనను మాత్రమే తీసుకుని చిన్న చిన్న ముక్కలుగా కట్ చేసి పెట్టుకోవాలి.
స్టెప్ 2: ఇప్పుడు స్టవ్ వెలిగించి పాన్ పెట్టుకోండి. అందులో కేవలం 1 టీస్పూన్ నూనె వేసి వేడి చేయండి. నూనె వేడయ్యాక సన్నగా తరిగిన వెల్లుల్లి రెబ్బలు, పచ్చిమిర్చి ముక్కలు వేసి వేయించండి.
స్టెప్ 3: వెల్లుల్లి పచ్చివాసన పోయి కమ్మటి వాసన వస్తున్నప్పుడు, తరిగిన ఉల్లిపాయ ముక్కలను వేసి దోరగా వేయించుకోవాలి. ఉల్లిపాయలు లేత బంగారు రంగులోకి మారాలి.
స్టెప్ 4: ఇప్పుడు అందులో 1 టీస్పూన్ పసుపు, 1 టేబుల్ స్పూన్ కారం, 1 టీస్పూన్ గరం మసాలా మరియు మీ రుచికి సరిపడా ఉప్పు వేసి మసాలాలన్నీ బాగా కలిసేలా వేయించండి.
స్టెప్ 5: మసాలా వేగిన తర్వాత ముందుగా కట్ చేసి పెట్టుకున్న గుడ్డు తెల్లసొన ముక్కలను ఇందులో వేయాలి. మసాలా అంతా గుడ్డు ముక్కలకు పట్టేలా సన్నని మంటపై ఒక నిమిషం పాటు ఫ్రై చేయండి.
స్టెప్ 6: ఆ తర్వాత పొడిపొడిగా వండి పెట్టుకున్న బాస్మతి రైస్‌ను పాన్‌లో వేయాలి. అన్నం మెతుకులు విరిగిపోకుండా, మసాలా మరియు ఎగ్ ముక్కలు అన్నానికి బాగా పట్టేలా నిదానంగా కలుపుకోవాలి. మంటను కాస్త పెంచి రెండు నిమిషాల పాటు రైస్‌ను ఫ్రై చేస్తే మంచి స్మోకీ ఫ్లేవర్ వస్తుంది.
స్టెప్ 7: చివరగా సన్నగా తరిగిన తాజా కొత్తిమీరను పైన చల్లుకుని, స్టవ్ ఆఫ్ చేసుకుంటే చాలు. వేడి వేడి 'బాయిల్డ్ ఎగ్ ఫ్రైడ్ రైస్' రెడీ!
చిట్కా: దీన్ని వేడివేడిగా ప్లేట్‌లోకి తీసుకుని, కొద్దిగా నిమ్మరసం పిండుకుని తింటే ఆ రుచే వేరు! పిల్లల లంచ్ బాక్స్‌కైనా, ఆఫీస్‌కు వెళ్లేవారికైనా ఇది పర్ఫెక్ట్ అండ్ క్విక్ మీల్.