అటుకులు, బెల్లంతో కమ్మని హల్వా..లొట్టలేసుకుంటూ తింటారు!

వేడి వేడి నెయ్యి గుమగుమలు.. దానికి తోడుగా యాలకుల సుగంధం..అలా నోట్లో వేసుకోగానే వెన్నలా కరిగిపోయే అద్భుతమైన తీపి. అబ్బా, ఊహించుకుంటుంటేనే నోట్లో నీళ్లు ఊరుతున్నాయి కదూ. అదేనండీ మన అటుకుల హల్వా. ఈ ప్రత్యేకమైన స్వీట్‌ ను ఒక్కసారి మీ ఇంట్లో చేసిపెట్టారంటే, పిల్లల నుండి పెద్దల వరకు అందరూ దీని రుచికి ఫిదా అవ్వాల్సిందే.

మనం తరచుగా చేసుకునే పాయసం లేదా ఇతర సాంప్రదాయ స్వీట్ల రుచిని సైతం మరిపించేంత అద్భుతంగా ఉంటుంది ఈ స్వీట్. పండుగ రోజుల్లో, ఇంట్లో ఏదైనా ప్రత్యేక సందర్భంలో లేదా సాయంత్రం వేళ ఏదైనా తీపి తినాలనిపించినప్పుడు ఎక్కువ శ్రమ లేకుండా క్షణాల్లో ఈ స్వీట్ సిద్ధం చేసుకోవచ్చు. నోరూరించే అటుకుల హల్వాను ఎలా తయారు చేసుకోవాలో ఇక్కడ చూడండి.

కావలసిన పదార్థాలు
బెల్లం తురుము - 1 కప్పు
నీళ్లు - 2 కప్పులు
యాలకులు - 3
అటుకులు - ఒకటిన్నర కప్పులు
నెయ్యి - 5 టేబుల్ స్పూన్లు
బాదం పప్పులు -10
జీడిపప్పు - 7-8
ఎండు ద్రాక్ష- 8
ఎండు కొబ్బరి లేదా పచ్చి కొబ్బరి ముక్కలు - 1 కప్పు
యాలకుల పొడి - అర టీస్పూన్

తయారీ విధానం

-ముందుగా స్టవ్ ఆన్ చేసి ఒక గిన్నె పెట్టుకోవాలి. అందులో రెండు కప్పుల నీళ్లు పోసి, కప్పు బెల్లం తురుము వేయాలి. మంటను మీడియం ఫ్లేమ్‌ లో ఉంచి బెల్లం పూర్తిగా కరిగేలా తిప్పుతూ ఉండాలి.

-బెల్లం కరిగిన తర్వాత అందులో యాలకుల పొడి వేసి బాగా కలపాలి. దీనికి పాకం రావాల్సిన అవసరం లేదు, బెల్లం కరిగితే చాలు. ఆ నీటిని పక్కన పెట్టుకోవాలి.

-ఇప్పుడు మందపాటి కడాయి లేదా పాన్ తీసుకుని అందులో రెండు టేబుల్ స్పూన్ల నెయ్యి వేసి వేడి చేయాలి. నెయ్యి కరిగాక ముందుగా బాదం, జీడిపప్పు వేసి దోరగా వేయించాలి. ఆ తర్వాత కిస్మిస్, కొబ్బరి ముక్కలను కూడా వేసి మంచి సువాసన వస్తూ, గోధుమ రంగులోకి మారే వరకు వేయించి ఒక గిన్నెలోకి తీసుకోవాలి.

-ఇప్పుడు అదే పాన్‌ లో మరో చెంచా నెయ్యి వేసి, అటుకులను వేయాలి. మంటను తక్కువగా ఉంచి అటుకులు కమ్మని వాసన వస్తూ, లేత గోధుమ రంగులోకి (క్రంచీగా) మారేంత వరకు ఓపిగ్గా వేయించుకోవాలి.

-అటుకులు పర్ఫెక్ట్‌ గా వేగిన తర్వాత, ముందుగా సిద్ధం చేసి పెట్టుకున్న బెల్లం నీటిని జాగ్రత్తగా అందులో పోయాలి. అటుకులు ఆ బెల్లం నీటిని పీల్చుకుని మెత్తగా ఉడికి, ఉబ్బే వరకు గరిటెతో కలుపుతూ ఉండాలి.

-అటుకులు పాకాన్ని పూర్తిగా పీల్చుకుని, దగ్గరపడి హల్వా ఆకృతికి వచ్చిన తర్వాత.. మిగిలిన నెయ్యిని పైన చల్లాలి. చివరగా మనం ముందుగానే నెయ్యిలో వేయించి పెట్టుకున్న డ్రై ఫ్రూట్స్ వేసి, అంతా కలిసేలా ఒక్కసారి కలుపుకుని స్టవ్ ఆఫ్ చేయాలి.

-అంతే ఘుమఘుమలాడే, అత్యంత రుచికరమైన అటుకుల హల్వా రెడీ.