సమ్మర్ స్పెషల్ లడ్డు.. శరీర వేడిని తగ్గించి ఒంటికి చలువ..ఎలా చేసుకోవాలంటే..

సమ్మర్ లో శరీరానికి చల్లదానాన్ని ఇచ్చే పదార్థాలు తినాలని డాక్టర్లు,నిపుణులు సూచిస్తుంటారు. ఈ క్రమంలో పుచ్చకాయలు, కొబ్బరినీళ్లు సహా శరీర వేడిని తగ్గించి ఒంటికి చలువచేసే అనేక రకాల ఆహారాలను తీసుకుంటుంటారు. అయితే సమ్మర్ లో ఇంట్లోనే ఈజీగా తయారుచేసుకునే ఓ లడ్డూ తింటే శరీర వేడి మొత్తం దిగిపోయి ఒంటికి చలువ చేస్తుంది. పిల్లలకు కూడా ఇది నచ్చుతుంది. బార్లీ,అవిసె గింజలతో ఈ లడ్డూ తయారుచేస్తారు. సమ్మర్ స్పెషల్ లడ్డూని ఇంట్లో తయారుచేసుకోడానికి కావాల్సిన పదార్థాలు,తయారీ విధానం ఇక్కడ చూడండి.

సమ్మర్ స్పెషల్ బార్లీ లడ్డూ తయారీకి కావాల్సిన పదార్థాలు

-బార్లీ గింజలు
-అవిసె గింజలు
-నెయ్యి
-బాదంపప్పు
-జీడిపప్పు
-పల్లీలు
-ఏలకులు
-బెల్లం

సమ్మర్ స్పెషల్ బార్లీ లడ్డూ తయారీ విధానం

-ముందుగా స్టవ్ మీద పాన్ పెట్టి అందులో 1 కప్పు బార్లీ గింజలు వేసి తక్కువ మంట మీద కలుపుతూ వేయించుకోవాలి. బ్రౌన్ కలర్ లోకి మారిన తర్వాత వాటిని పక్కనపెట్టి పూర్తిగా చల్లారనివ్వాలి.

-తర్వాత స్టవ్ మీద పాన్ లో 1కప్పు పల్లీలు వేసి వేయించి వీటిని కూడా పక్కనపెట్టుకోండి.

-తర్వాత స్టవ్ మీద పాన్ లో పావు కప్పు అవిసె గింజలు వేసి 2 నిమిషాలు వేయించుకోవాలి. వీటిని వేయించిన పల్లీలలో వేసి పూర్తిగా చల్లారనివ్వాలి.

-ఇప్పుడు స్టవ్ మీద పాన్ లో 1 టేబుల్ స్పూన్ నెయ్యి వేడి చేసి ఇందులో 15-20 బాదంపప్పులను ముక్కలుగా కట్ చేసి వేసి వేయించుకోవాలి. బాదంపప్పు ముక్కలు సగం వరకు వేగాక ఇందులో 20 జీడిపప్పు ముక్కలు కూడా వేసి బాగా ఎర్రగా వేయించుకొని వీటిని ఓ గిన్నెలోకి తీసుకొని పక్కనపెట్టుకోండి.

శరీరానికి పుష్టినిచ్చే రాగి లడ్డు..ఇంట్లోనే ఈజీగా ఎలా చేసుకోవాలంటే

-వేయించిన బార్లీ గింజలు పూర్తిగా చల్లారిన తర్వాత వాటిని మిక్సీ గిన్నెలో వేసి ఇందులోనే 4 ఏలకులు వేసి మధ్య మధ్యలో ఆపుకుంటూ వీలైనంత మెత్తగా గ్రైండ్ చేశాక ఇందులోనే వేయించిన పల్లీలు,అవిసె గింజలు కూడా వేసి మళ్లీ గ్రైండ్ చేసుకోవాలి. ఈ పొడిని ఓ గిన్నెలో లేదా పాన్ లో వేసి ఇందులోనే ముప్పావు కప్పు బెల్లం తరుము వేసి బాగా కలిపి ఈ పొడిని మళ్లీ గ్రైండ్ చేసుకోవాలి.

-గ్రైండ్ చేసిన పొడిని ఓ గిన్నెలో వేసి ఇందులోనే వేయించిన జీడిపప్పు,బాదం ముక్కలు వేసి బాగా కలిసేలా కలుపుకోవాలి. తర్వాత పిండిలో కొంచెం కొంచెంగా నెయ్యి వేసుకుంటూ లడ్డూలా మీకు నచ్చిన సైజులో చేసుకోండి. అంతే సమ్మర్ స్ఫెషల్ బార్లీ లడ్డు రెడీ.