మెత్తటి, దూదిలాంటి లెమన్ ఇడ్లీ..ఒక్క ముక్క తిన్నా ఫిదా అవ్వాల్సిందే!

డైలీ అదే ఇడ్లీ, దోశ తిని బోర్ కొడుతోందా? బ్రేక్ ఫాస్ట్ లో ఏదైనా కొత్తదనం, ప్రత్యేకత కావాలనిపిస్తోందా? అయితే ఓసారి నిమ్మకాయ ఇడ్లీ ట్రై చేయండి. ప్రతి ముక్కలోనూ పుల్లపుల్లగా, కమ్మకమ్మగా తగిలే నిమ్మకాయ ఫ్లేవర్ మీ రుచి మొగ్గలను మేల్కొలపడం ఖాయం.

దీనిని తక్కువ సమయంలో, సులభంగా తయారుచేసుకోవచ్చు. ఇది కేవలం రుచికరమైనదే కాదు చాలా తేలికైనది, ఆరోగ్యకరమైనది కూడా. పిల్లల నుండి పెద్దల వరకు అందరూ ఇష్టపడే ఈ వంటకం మీ ఇంట్లో కచ్చితంగా ఓ కొత్త అభిమానాన్ని సంపాదించుకుంటుంది. నిమ్మకాయ ఇడ్లీ ఎలా చేసుకోవాలో ఇక్కడ చూడండి.

కావలసిన పదార్థాలు
ఇడ్లీ రవ్వ - 1 కప్పు
పెరుగు - అర కప్పు
నీరు - అర కప్పు
నిమ్మరసం - 2 టేబుల్ స్పూన్లు
పచ్చిమిర్చి - 1-2
అల్లం - 1 అంగుళం ముక్క
కొత్తిమీర - 2 టేబుల్ స్పూన్లు
వంట సోడా- అర టీస్పూన్
ఉప్పు - రుచికి తగినంత
నూనె - ఇడ్లీ రేకులకు రాయడానికి

తయారీ విధానం

ముందుగా ఒక పెద్ద గిన్నె తీసుకుని అందులో ఇడ్లీ రవ్వను వేయండి. తగినన్ని నీళ్లు పోసి, రవ్వ మెత్తబడటానికి సుమారు 10-15 నిమిషాల పాటు నానబెట్టండి. రవ్వ ఎంత బాగా నానితే, ఇడ్లీలు అంత మృదువుగా, దూదిలా వస్తాయి.

ఈలోగా మరో గిన్నెలో పెరుగు, నిమ్మరసం, సన్నగా తరిగిన పచ్చిమిర్చి, అల్లం తురుము, తాజా కొత్తిమీర,రుచికి సరిపడా ఉప్పు వేసి బాగా కలపాలి. ఈ మిశ్రమం ద్వారానే ఇడ్లీకి అసలైన రుచి వస్తుంది.

ఇప్పుడు నానబెట్టిన రవ్వ నుండి అదనపు నీటిని పిండేసి దానిని పెరుగు మిశ్రమంలో వేయండి. గడ్డలు లేకుండా అన్నీ కలిసేలా బాగా కలపండి. ఇడ్లీ పిండి మరీ జారుగా కాకుండా, కొంచెం గట్టిగా ఉండాలి. అవసరమైతే కొన్ని నీళ్లు చేర్చుకుని పిండిని సరైన పాకంలోకి తీసుకురండి.

తర్వాత ఇడ్లీలు పెట్టే ముందు పిండిలో వంట సోడా వేసి, దానిపై ఒక టీస్పూన్ నీరు వేసి నెమ్మదిగా కలపాలి.

సోడా కలిపిన వెంటనే పిండిని ఇడ్లీ పాత్రలలో నింపాలి. ఇడ్లీ పాత్ర హోల్స్ కి కొద్దిగా నూనె రాసి సిద్ధం చేసుకున్న పిండిని వాటిలో నింపండి. మీడియం మంట మీద 10-12 నిమిషాల పాటు ఆవిరిపై ఉడికించుకోవాలి.

ఇడ్లీలు ఉడికిన వెంటనే ఆత్రంగా మూత తెరవకండి. ఒక్క రెండు నిమిషాలు ఆగి, ఆ తర్వాత తీస్తే ఇడ్లీలు అంటుకోకుండా, విరిగిపోకుండా సులభంగా వస్తాయి.

అంతే నోరూరించే, వేడివేడి, మెత్తటి నిమ్మకాయ ఇడ్లీలు రెడీ.