పెద్దలు కుదిర్చిన పెళ్లిలో ఆ క్షణాలను హాయిగా ఆస్వాదించొచ్చా...

ఇష్టాయిష్టాలకు విలువ..

మీ ఇష్టాలకు విలువ ఇస్తూనే మీకు సరైన జోడిని ఎంపిక చేసేందుకు తల్లిదండ్రులు బాగానే కష్టపడతారు. కానీ ఒక సంబంధం వచ్చిందంటే ముందుకు వెళ్లొచ్చా.. లేదా అని మనకంటే ఎక్కువ ఆలోచిస్తారు. తెలిసిన వారందరితో ఆరా తీస్తారు. అయితే ప్రేమ వివాహంలో ఇలాంటి వాటికి అవకాశం ఉండకపోవచ్చు.

బాగా సర్దుకుపోతారు..

పెద్దలు కుదిర్చిన పెళ్లిలో దాదాపుగా మీ పుట్టింటి, అత్తింటి వారి ఆచార వ్యవహారాలు, సంప్రదాయాలు ఒకటే కావడం వల్ల మీ అత్తింట్లో మీరు త్వరగానే ఇమిడిపోగలుగుతారు. పైగా మిమ్మల్ని మీరు పెద్దగా మార్చుకోవాల్సిన అవసరం కూడా ఉండదు.

దగ్గరి వ్యక్తినే..

పెద్దలు కుదిర్చిన పెళ్లిలో మీ కుటుంబ ఆచార వ్యవహారాలు, సంప్రదాయాలు, కట్టుబాట్లకు దగ్గరగా ఉండే కుటుంబానికి చెందిన అబ్బాయినే మీకు భర్తగా తీసుకొచ్చేందుకు ప్రయత్నిస్తారు. కాబట్టి మీ భర్త అందరితో చాలా త్వరగా కలిసిపోతారు. చిన్న చిన్న ఇబ్బందులున్నప్పటికీ సర్దుకుపోతారు.

భవిష్యత్తు గురించి..

పెళ్లి తర్వాత అయినా.. పెళ్లికి ముందు అయినా ప్రతి ఒక్కరికి భవిష్యత్తు గురించి చాలా ఆలోచనలుంటాయి. ముఖ్యంగా తమ లైఫ్ పార్ట్ నర్ ఎలా ఉండాలో అనే విషయంపై కూడా స్పష్టత ఉంటుంది. కాబట్టి మీకు నచ్చిన వరుడు దొరికేంత వరకు మీరు ఎదురుచూడొచ్చు.

కొన్ని అనుమానాలు..

ఎవరితో అయినా ప్రేమలో ఉన్నా.. డేటింగ్ చేస్తున్నా.. మీకు కొన్ని సందేహాలుంటాయి. ‘నాకు పెళ్లవుతుందా?' ‘నన్ను మోసం చేయరు కదా'అనే అనుమానాలు వేధిస్తుంటాయి. అంతేకాదు ‘నేను వారి కుటుంబానికి నచ్చుతానా' అనే విషయాలు కొంత భయపెడుతుంటాయి. అయితే పెద్దలు కుదిర్చిన పెళ్లిలో ఇలాంటి సందేహాలు పెద్దగా ఉండకపోవచ్చు.

ప్రేమ వివాహంలో..

ప్రేమ వివాహం చేసుకున్న వారు తమ లైఫ్ పార్ట్ నర్ ఇంతకుముందులా లేరని.. బాగా మారిపోయారని చెబుతూ ఉంటారు. చాలా సందర్భాల్లో భార్యభర్తల మధ్య మనస్పర్దలు కూడా వస్తుంటాయి. అయితే పెద్దలు సెట్ చేసిన సంబంధంలో మార్పు గురించి పెద్దగా ప్రస్తావన రాకపోవచ్చు. ఎందుకంటే వివాహం తర్వాత వారి న్యూ లైఫ్ స్టార్టవుతుంది కాబట్టి. ఈ క్రమంలో ఇద్దరు ఒకరినొకరు తెలుసుకొంటు ముందుకు సాగుతారు.

పెద్దగా అంచనాలుండవు..

పెద్దలు సెట్ చేసే మ్యాచ్ విషయంలో వివాహం చేసుకునే వారు చాలా ఓపికగా ఉంటారు. ముందుగా తమ భాగస్వామి గురించి తెలుసుకునేందుకు ప్రయత్నిస్తారు. ఎందుకంటే ఇద్దరూ ఒకరితో ఒకరు పెద్దగా పరిచయం లేనివారే. కాబట్టి ఒకరిపై ఒకరు పెద్దగా అంచనాలు పెంచుకోరు. అంతేకాదు ప్రతి క్షణాన్ని హాయిగా ఆస్వాదిస్తారు.