మీ పార్ట్ నర్ తో ప్రేమ పెరగాలంటే... రొమాన్స్ ఒక్కటే కాదు... ఇవీ ముఖ్యమే...

హనీమూన్ తర్వాత..

చాలా మంది కపుల్స్ ప్రేమించుకుని.. పెళ్లి చేసుకున్న తర్వాత హనీమూన్ కు వెళ్తుంటారు. అయితే ఎప్పుడైతే అది పూర్తవుతుందో అప్పటి నుండి రోటీన్ వర్క్ లో బిజీ అయిపోతారు. అసలు తమ మధ్య కేవలం ఫిజికల్ రిలేషన్ తప్ప ప్రేమకు చోటే లేదన్నట్టు ప్రవర్తిస్తారు.

సర్ ప్రైజ్ చేయండి..

భార్యభర్తల బంధంతో పాటు ఏ సంబంధంలో అయినా సర్ ప్రైజ్ అంటే అందరూ ఇష్టపడతారు. దానికి మించిన అద్భుతం మరొకటి లేదనడంలో ఎలాంటి అతిశయోక్తి లేదు. అందుకే మీ పార్ట్ నర్ కు ఏ ఫుడ్ ఇష్టమో తెలుసుకుని.. స్వయంగా మీరే ప్రిపేర్ చేసేయ్యండి.

ప్రేమగా తినిపించండి..

మీ భాగస్వామి రోజంతా ఎక్కడెక్కడి నుండో తిరిగి ఇంటికి అలసిపోయి వచ్చిన తర్వాత మీరే స్వయంగా తనకిష్టమైన రెసిపీ రెడీ చేసి ప్రేమగా తినిపించండి. ఇది కేవలం స్త్రీలకే కాదు.. మగవారికి కూడా వర్తిస్తుందని గుర్తుంచుకోండి. దీని వల్ల మీ ఇద్దరి మధ్య ప్రేమ మరింత పెరుగుతుంది.

మళ్లీ మళ్లీ ప్రేమ కావాలంటే..

మీ భాగస్వామి చేసే ఏ చిన్న పనైనా మీకు నచ్చితే చాలు తనను పొగడ్తలతో ముంచేయండి. తనను దగ్గరకు తీసుకుని.. డార్లింగ్ అంటూ ఓ రొమాంటిక్ కిస్ కానుకగా ఇచ్చేయండి. మీ కోసం వారు ప్రత్యేకంగా ఏది చేసినా వెంటనే గుర్తించి మీరిచ్చే రొమాంటిక్ రియాక్షన్ వల్ల వారిని మళ్లీ మళ్లీ ప్రేమలో పడేలా చేస్తుంది.

నలుగురిలో ప్రత్యేకంగా..

మీ ఇద్దరి మధ్య ఉన్న బంధం నలుగురిలోనూ ప్రదర్శించండి. సాధారణంగా ఏకాంతంగా ఉన్న సమయంలో ఒక్క క్షణం కూడా భాగస్వామిని వదిలి ఉండని వారు, నలుగురిలో మాత్రం ఏమి తెలియని అమాయకుల్లా ప్రవర్తిస్తారు. అయితే మీరు అలా చేయకుండా నలుగురిలో ఉన్నప్పుడు తన చేయిని వదలకుండా పట్టుకుని చూడండి. నలుగురిలో మీరు ప్రత్యేకంగా కనిపిస్తున్నారని వారికి అర్థమయ్యేలా ప్రవర్తించండి.

వాదనలొస్తే..

భార్యభర్తలు లేదా ప్రేమికుల మధ్య బంధం ఎంత బలంగా ఉన్నప్పటికీ, తమ మధ్య ఏదో సందర్భంలో అభిప్రాయ భేదాలు వస్తుంటాయి. అలాంటి సమయంలో తమదే ఆధిపత్యం కావాలని, వాదనలు పెట్టుకోకండి. ఎవరో ఒకరు రాజీ పడండి. లేదంటే మీ భాగస్వామికే అవకాశం ఇవ్వండి.

ఇద్దరూ కలిసి షో చూస్తే..

మీరిద్దరూ మాత్రమే ఇంట్లో ఉండి టివిలో ఏదైనా సినిమా లేదా షో చూస్తుంటే.. అది మీకు నచ్చకపోయినా.. తనకిష్టం కాబట్టి మీరు కూడా తను ఏది చెబితే దానికి వత్తాసు పలకండి. ఎందుకంటే అలా చేస్తే ఆ తర్వాత మీకిష్టమైన షో చూస్తున్నప్పుడు వారు కూడా మద్దతు ఇస్తారు. అలా మీ ఇద్దరి మధ్య ప్రేమ పెరుగుతుంది.

ఏదైనా టూర్..

మీరిద్దరూ వారంలో ఆరు రోజులు రోటీన్ పనులు చేస్తుంటారు కాబట్టి వారాంతంలో ఏదైనా టూర్ ప్లాన్ చేయండి. అయితే టూర్ అనగానే దూరప్రాంతాలకు వెళ్లాల్సిన అవసరం లేదు. సరదాగా లాంగ్ డ్రైవ్ కు వెళ్లండి. ఆ ఫీలింగ్ మాత్రం సూపర్ గా ఉంటుంది.