Hug Day 2022 : కౌగిలింతల్లో ఏదో తెలియని పులకింత... మనసులోనూ ఏదో గిలిగింత...

బియర్ హగ్..

బియర్ హగ్ అనేది సాధారణంగా స్నేహితులు ఇచ్చి పుచ్చుకుంటారు. సాధారణంగా ఎలుగుబంట్లు వాటి బలంతో మనల్ని చంపగలవని చాలా మంది పెద్దలు చెబుతూ ఉంటారు. అయితే స్నేహితులను ఈ విధంగా ఈ కౌగిలితో పలకరించేవారు మంచి స్నేహితులుగా గుర్తింపు పొందుతారు.

ఆప్యాయతతో ఆలింగనం..

ఇలాంటి కౌగిలింతలు ‘ప్రేమికులకు ఎక్కువ.. స్నేహితులకు తక్కువ‘‘ అన్న రీతిలో మనకు దర్శనమిస్తుంటాయి. ఈ కౌగిలిలో ఎదుటి వ్యక్తిని ఎంతో ఆప్యాయంగా ఆలింగనం చేసుకుని.. వారి భుజంపై తలవాలుస్తారు. అంతేకాదు ఆపై పక్కనే ఉండే చెవిలో ఏవేవో గుసగుసలు వినిపిస్తుంటారు. మీరు ఈ రకమైన కౌగిలింత ఒకరిపై మరొకరికి అమితమైన నమ్మకం ఉందని కచ్చితంగా తెలుపుతుంది.

వీడ్కోలు కౌగిలింత..

మీ మనసుకు దగ్గరగా ఉన్న ఎవరైనా మిమ్మల్ని వదిలి చాలా దూరం వెళ్తున్నప్పుడు మీరు వారిని చాలా సేపు కౌగిలించుకుంటారు. ఈ కౌగిలింతలో ఎక్కువగా కన్నీళ్లతో నిండి ఉంటుంది.

సన్నిహిత కౌగిలి..

ఈ రకమైన కౌగిలి అనేది మీ జీవితంలో ప్రత్యేకమైన వ్యక్తికి మాత్రమే ఉంటుంది. అది చాలా సన్నిహితంగా ఉంటుంది. ఈ రకమైన కౌగిలిలో ఇద్దరు ప్రేమికులు వారి హృదయ స్పందనలను మరియు వారి శ్వాసను వింటారు.

ముద్దుల కౌగిలింత..

కౌగిలింత అనేది ముద్దూ ముచ్చటలకు స్వాగతం పలికే ఆహ్వానం. రొమాన్స్ అనేది కౌగిలింతతో ప్రారంభమై అది ఫాంటసీలకు కూడా దారి తీస్తుంది. కాబట్టి మీరు ముద్దు లేదా అంతకంటే ఎక్కువ ఆహ్వానంగా కౌగిలింతను కూడా ఉపయోగించుకోవచ్చు.

పొలైట్ హగ్..

మన ముఖంలో సంతోషం.. పెదవిపై చిరునవ్వు కలగలిపి ఎదుటి వ్యక్తిని ఆత్మీయంగా దగ్గరకు తీసుకోవడాన్ని పొలైట్ హగ్ అని పిలుస్తారు. ఇలాంటి ఆలింగనాలు చాలా ఎక్కువగా స్నేహితుల మధ్య మరియు తల్లిదండ్రులు, పిల్లల మధ్య తరచూ కనబడుతూ ఉంటాయి.

పట్టపగ్గాల్లేని ఆనందంతో...

ఎన్నో ఏళ్ల నుంచి వేచి చూసిన వారు మన కళ్లెదుట వాలిపోతే.. అప్పుడు పట్టపగ్గాల్లేని ఆనందంతో అమాంతం వారాని కౌగిలించుకుని ఉక్కిరి బిక్కిరి చేసేస్తారు. ఈ కౌగిలిలో ఎదుటివారి చుట్టూ చేతులు రెండూ చుట్టేసి, వారిని గాఢంగా హత్తుకుని కౌగిలిలో బంధిస్తారు. ఎంతో ఆత్మీయతతో అందించే ఇలాంటి కౌగిలిని అందరూ స్వాగతిస్తారు. ముఖ్యంగా ప్రేమికులు ఇలాంటివి తెగ ఎంజాయ్ చేస్తారు.

అమ్మ కౌగిలింత..

మీరు మీ తల్లి ఎదపై ప్రేమతో తల వాలిస్తే అది అమ్మ కౌగిలింత.ఈ రకమైన కౌగిలింత ఒక్క మీ తల్లి మాత్రమే మీకు ఇవ్వగలదు. అయితే కొన్నిసార్లు ప్రేమికులు కూడా ఒకరినొకరు ఓదార్చుకోవడానికి ఇలాంటి కౌగిలింతలు ఇచ్చుకుంటారు. కాబట్టి వీటిలో మీకు ఏ హగ్ నచ్చిందో వాటిని ప్రయత్నించి చూడండి... అద్భుతమైన అనుభూతిని పొందండి.