Bhadrapada Masam 2020 : భాద్రపద మాసంలో వినాయక చవితితో పాటు మరికొన్ని ముఖ్య పండుగలివే...

కల్కి జయంతి..

శ్రీ శార్వరి నామ సంవత్సరంలోని భాద్రపద మాసంలో మొట్టమొదట వచ్చే పండుగ కల్కి జయంతి. ఆగస్టు 20వ తేదీన ఈ పండుగతో భాద్రపద మాసం ప్రారంభమవుతుంది. 21వ తేదీన సువర్ణగౌరీ వ్రతం వస్తుంది.

వినాయక చవితి..

హిందువులందరూ ఏ పూజ చేయాలన్నా.. ఏ పని చేయాలన్నా తొలుత గుర్తొచ్చేది గణపతి దేవుడే. వినాయకుడు పుట్టిన రోజునే వినాయక చవిత పండుగగా జరుపుకుంటారు. దీనికి రకరకాల ప్రాంతాల్లో అనేక పేర్లు ఉన్నాయి. కొన్నిచోట్ల గణపతి చవితి అని, గణేష్ చతుర్థి అని, మరికొన్ని చోట్ల వినాయక చవితి అని పిలుస్తుంటారు. ఈరోజు హిందువులలో చాలా మంది నియమ నిష్టలతో పూజలు చేస్తారు. వినాయకుడికి 21 రకాల పత్రాలతో పూజించి ఉండ్రాళ్లు నైవేద్యం పెడతారు. విద్యార్థులు గణపతి విగ్రహం దగ్గర పుస్తకాలను పెట్టి పూజిస్తారు. ఇక చాలా మంది గుంజిల్లు కూడా తీస్తారు.

పరివర్తన ఏకాదశి..

ఈ నెలలో వచ్చే తొలి ఏకాదశి రోజున శేషతల్పంపై శయనించిన మహావిష్ణువు ఈరోజున వేరేవైపునకు తిరుగుతాడని, అనగా పరివర్తనం చెందుతాడని పండితులు చెబుతారు. అందుకే ఈ ఏకాదశిని పరివర్తన ఏకాదశి అంటారు. ఈ ఏకాదశి వ్రతం ఆచరించడం వలన కరువు కాటకాలు రావని, ఒకవేళ వచ్చినా వాటి నుండి ఎలా బయటపడాలో తెలుస్తుందని చాలా మంది నమ్ముతారు.

వామన జయంతి..

శ్రీ మహావిష్ణువు దశావతారాల్లో ఒకటైన వామన జయంతి కూడా ఈ నెలలోనే వస్తుంది. శ్రీ మహావిష్ణువు బలిచక్రవర్తిని తన మూడు అడుగులతో పాతాళానికి పంపిన అవతారం. ఈరోజున వామన దేవునికి పూజ చేసి, నైవేద్యం పెట్టి పెరుగును దానం చేయాలని చెబుతారు.

అనంత పద్మనాభ చతుర్దశి..

శ్రీ మహావిష్ణువుకు ఉండే పేర్లలో అనంత పద్మనాభ చతుర్దశి ఒకటి. శ్రీమహావిష్ణువు అనంతుడని నమ్ముతూ హిందువులు అనంత పద్మనాభ చతుర్దశి లేదా అనంతవ్రతం అనే పేర్లతో పిలుస్తారు.

ధర్మప్రభ ఏకాదశి..

ఈ మాసంలో వచ్చే అజ ఏకాదశిని ధర్మప్రభ ఏకాదశి అని కూడా అంటారు. పురాణాల ప్రకారం హరిశ్చంద్రుడు అన్నీ పొగొట్టుకున్న సమయంలో కాటికాపరిగా ఉంటూ ఈ ఏకాదశి రోజున వ్రతం చేయడం వల్ల తిరిగి సుఖ సంపదలు, ఆయురారోగ్యాలు, రాజభోగాలు పొందాడని పండితులు చెబుతుంటారు.

అలాగే ఈ నెలలో వచ్చే పండుగల సమయంలో పేదలకు దానధర్మాలు చేస్తే కచ్చితంగా మంచి ఫలితం వస్తుంది.