Ratha Saptami 2024 :రథసప్తమి నాడు స్నానం చేసే వేళ ఈ శ్లోకాలను పఠిస్తే సమస్త పాపాలు నశిస్తాయి...!

ఇలా చేయాలి..

రథసప్తమి రోజున సూర్యోదయానికి ముందు తలస్నానం చేయాలి. అలా చేయడానికి ముందు మగవారు ఏడు జిల్లేడు ఆకులు, మహిళలు ఏడు చిక్కుడు ఆకులు తల, భుజాలపై ఉంచుకుని ఈ కింద మంత్రాన్ని చదువుతూ స్నానం చేయాలి.

ఈ మంత్రం చదువుతూ..

‘జననీ త్వం హి లోకానం

సప్తమీ సప్తసప్తికే, సప్తవ్యాహృతికే దేవి!

సమస్తే సూర్యమాతృకే'

‘సప్తాశ్యముల గల ఓ సప్తమీ!

నీవు సకల లోకాలకు, భూతాలకు, జననివి.

సూర్యుడికి తల్లివైన నీకు వందనాలు' అని ఈ మంత్రం యొక్క అర్థం.

ఏడు జన్మల పాపం..

రథ సప్తమి రోజున ఇలా జిల్లేడు, చిక్కుడు ఆకులను తల, భుజాలపై ఉంచుకుని స్నానం చేస్తూ.. అదే సమయంలో ఈ మంత్రాన్ని జపిస్తూ తలస్నానం చేయడం వల్ల మీకు ఏడు జన్మల నుండి వస్తున్న పాపాలన్నీ తొలగిపోతాయని పండితులు చెబుతున్నారు.

మరో మంత్రం..

యదా జన్మకృతం పాపం మయాజన్మసు జన్మసు

తస్య రోగంచ శోకంచ మాకరీ హంతు సప్తమీ

ఏతజ్ఞన్మకృతం పాపం యచ్ఛ జనమంతరార్జితం మనోవాక్కాయజం యచ్ఛ జ్ఞాతాజ్ఞాతేచ యే పున:

సప్త విధం పాపం స్నానామ్నే సప్త సప్తికే

సప్త వ్యాధి సమాయుక్తం హరమాకరి సప్తమి

ఎర్రని పువ్వులతో..

రథసప్తమి రోజున మంత్రాలు చదువుతూ స్నానం చేసిన తర్వాత ఎర్రని రంగులో ఉండే పువ్వులతో సూర్యభగవానుడికి ప్రత్యేక ప్రార్థనలు చేయాలి. సూర్యదేవుని చిత్రపటానికి ఎర్రని కుంకుమ, గంధంతో పూజలు చేయాలి. అలాగే ఆవు నేతితో చేసిన దీపాన్ని వెలిగించాలి.

సూర్యుడిని పూజిస్తే..

రథసప్తమి రోజున ఆదిత్యుడిని ఇలా పూజించడం వల్ల అష్టైశ్వర్యాలూ సిద్ధిస్తాయని చాలా మంది నమ్మకం. అంతేకాదు ఈరోజున సూర్యోదయానికి ముందే స్నానం చేయడం వల్ల ఎన్నో ఆరోగ్య ప్రయోజనాలు కూడా లభించనున్నాయి. మీకు చర్మ రోగాల నుండి విముక్తి లభిస్తుంది. పురాణాల ప్రకారం, శ్రీరాములు కూడా ఆదిత్య హృదయాన్ని పఠించి రావణ వథకు బయలుదేరారట. సూర్యునికి ఇష్టమైన ఈ పండుగ రోజున ఈ మంత్రాలను పటించి. సూర్యుడిని పూజించడం వల్ల విశేష ఫలితాలు రానున్నాయి.