Varalakshmi Vratham 2022:పెళ్లికాని ఆడపిల్లలు వరలక్ష్మీ వ్రతం చేయొచ్చా?

వివాహితలకు మాత్రమే..

హిందూ ఆచారాల ప్రకారం, వరలక్ష్మీ వ్రతాన్ని కేవలం పెళ్లయిన మహిళలు మాత్రమే వరలక్ష్మీ వ్రతాన్ని చేయాలని పండితులు చెబుతున్నారు. ఈ వ్రతాన్ని కన్యలుగా ఉండే అమ్మాయిలు చేయడాన్ని నిషేధించారు. ఎందుకంటే వివాహితులు తమ కుటుంబం యొక్క ఆనందం, సంతోషం, శాంతి, శ్రేయస్సు కోసం ఈ వ్రతాన్ని చేస్తారు. ఈ పర్విదినాన వారి కుటుంబంలోని అత్త, భర్త ఇతర కుటుంబసభ్యులకు సేవ చేయడం ద్వారా, లక్ష్మీదేవిని ఆరాధించడం వల్ల ఆదర్శంతమైన మహిళా జీవితాన్ని గడుపుతారు.

కన్యలకు నిషేధం..

పెళ్లి కాని మహిళలకు అత్త, మామ, భర్త, ఇతర కుటుంబ సభ్యులకు సేవ చేసుకునే అవకాశం లేదు కాబట్టి.. మీకు మెట్టినింటితో ఎలాంటి సంబంధం ఉండదు కాబట్టి.. కన్యలుగా ఉండే అమ్మాయిలు ఈ వరలక్ష్మీ వ్రతాన్ని ఆచరించకూడదని పండితులు చెబుతున్నారు.

నచ్చిన వారితో..

మరో కథనం ప్రకారం.. శ్రావణ మాసంలో వచ్చే రెండో శుక్రవారం రోజున వరలక్ష్మీ వ్రతాన్ని పెళ్లికాని అమ్మాయిలు కూడా చేయొచ్చట. పెళ్లి కాని కన్యలు ఈ వ్రతాన్ని ఆచరించడం వల్ల తమ మనసుకు నచ్చిన వారితో పెళ్లి జరుగుతుందని నమ్మకం.

ముత్తైదువులు..

వరలక్ష్మీ వ్రతం చేసేటప్పుడు హిందువుల ఇళ్లన్నీ పండుగ వాతావరణం సంతరించుకుంటాయి. ఈ పవిత్రమైన రోజున లక్ష్మీదేవికి ప్రత్యేక పూజలు నిర్వహిస్తారు. పూలు, పళ్లు, ప్రసాదాలతో అమ్మవారికి నైవేద్యం సమర్పిస్తారు. ఈ వ్రతం చేసేటప్పుడు మంగళ సూత్రాన్ని పూజలో ఉంచి దాన్ని ధరించడం వల్ల సుఖసంతోషాలు వెల్లివిరిసి.. దీర్ఘ సుమంగళిగా ఉంటారని పండితులు చెబుతారు.

పూజ పూర్తయ్యాక..

వ్రతం సమయంలో నేవైద్యాలు అర్పించి.. చేతికి కంకణం కట్టుకుని.. అక్షింతలు తలపై వేసుకొని పూజను పూర్తి చేయాలి. ఆ తర్వాత ముత్తైదువులందరికీ తాంబూలాలు ఇచ్చి తీర్థ ప్రసాదాలు ఇవ్వాలి. అమ్మవారికి పెట్టిన నైవేద్యాన్ని ఆరోజే తినేయాలి. అలాగే రాత్రి వరకూ ఉపవాసం ఉండాలి. ఇంతకన్నా ఈ వ్రతానికి పెద్దగా నియమనిష్టలంటూ ఏమీ లేవని పండితులు చెబుతున్నారు.