దీపావళి వేళ లక్ష్మీదేవి అనుగ్రహం కావాలంటే.. ఈ వాస్తు చిట్కాలు ఫాలో అవ్వండి...

ఈ వస్తువులను..

లక్ష్మీదేవికి దీపావళి పండుగ అంటే ఎంతో ఇష్టమైనది. ఈ పవిత్రమైన రోజున ఉప్పు నింపిన గాజు సీసాని ఇంట్లో ఏదో ఒక మూల గాని, స్నానాల గదిలో గాని పెడితే ప్రతికూల శక్తులన్నీ బయటకు పోయి.. లక్ష్మీదేవి ఇంట్లో కొలువై ఉంటుందని చాలా మంది నమ్ముతారు. వాస్తు శాస్త్రం ప్రకారం, పాత బట్టలు, విరిగిన బల్లలు, పాత్రలు దుమ్ము పేరుకుపోయిన వస్తువులను తొలగించి శుభ్రం చేసుకోవాలట. దీని ఉద్దేశ్యం చెడు విషయాలను వదిలించుకుని కొత్త వస్తువులను ఇంట్లో ఏర్పాటు చేసుకోవాలి.

ప్రత్యేక దీపారాధన..

దీపావళి అంటే దీపాల పండుగ. రంగు రంగుల దీపాలను ఇంటి చుట్టూ వెలిగించడం వల్ల.. వాటి నుండి వెలువడే కాంతి ద్వారా ప్రతికూల శక్తిని తరిమికొట్టొచ్చు. అయితే మట్టితో చేసిన దీపాలను వెలిగించడం పూర్వం నుండి సంప్రదాయంగా వస్తుంది. అలాగే నువ్వుల నూనె లేదా ఆవు నెయ్యి వేసి వత్తుల ద్వారా దీపాలను వెలిగించాలి. వాస్తు శాస్త్రం ప్రకారం ఉత్తర దిశలో మట్టి దీపాలను వెలిగించాలి. తూర్పున పచ్చని రంగులో.. ఆగ్నేయం దిశలో నారింజ రంగులో.. దక్షిణ దిశలో ఎరుపు, నైరుతి వైపున గులాబీ రంగు, పడమర దిశలో నీలం, వాయువ్యంలో నీలం లేదా బూడి రంగులో ఉండే దీపాలను వెలిగిస్తే శుభ ఫలితాలొస్తాయట.

దోషం పోవాలంటే..

పురాతన గ్రంథాల ప్రకారం వాస్తు దోషాలు పోవాలంటే.. దీపావళి వేళ శ్రీ యంత్రాన్ని వాడాలట. దీన్ని వాడటం వల్ల ఆర్థిక సమస్యల నుండి ఉపశమనం లభిస్తుందని చాలా మంది నమ్ముతారు. అలాగే మీ జీవితంలో ఎదురయ్యే అనేక అడ్డంకులను అధిగమించడానికి.. మీరు హ్యాపీగా జీవితాన్ని ఎంజాయ్ చేసేందుకు ఇది చక్కగా ఉపయోగపడుతుందట. దీపావళి వేళ ప్రపంచంలోని శక్తులన్నీ అత్యంత అనుకూలంగా ఉంటాయట. అయితే ఈ శ్రీ యంత్రాన్ని తూర్పు దిక్కున ఉంచాలట. ఎందుకంటే పూజా మందిరం ఆ దిశలోనే ఉంటుంది కనుక.

కుభేర పూజ..

దీపావళి వేళ ధనలక్ష్మీకి ప్రతిరూపమైన కొన్ని ప్రత్యేక చిహ్నాలను కూడా పూజిస్తారు. అదే సమయంలో లక్ష్మీదేవితో పాటు కుభేరుడిని పూజించాలి. ముఖ్యంగా వ్యాపారులు ఈ పూజను ఎక్కువగా చేస్తుంటారు. లక్ష్మీదేవి శ్రేయస్సు, సంపదకు ప్రతిరూపం అయితే.. కుభేరుడు ఆ సంపదను నిర్వాహకుడిగా వ్యవహరించి.. డబ్బుకు రక్షణగా ఉంటాడని చాలా మంది నమ్ముతారు. హిందూ పురాణాల్లోనే కాకుండా జైన, బౌద్ధ సంప్రదాయాల్లోనూ కుభేరుడికి ప్రత్యేక స్థానముంది. కాబట్టి దీపావళి సందర్భంగా లక్ష్మీదేవితో పాటు కుభేరుడిని కచ్చితంగా పూజించాలి.

శుభ ముహుర్తంలో..

హిందూ పంచాంగం ప్రకారం, దీపావళి వేళ లక్ష్మీదేవి పూజను ఎల్లప్పుడూ శుభముహుర్తంలోనే ప్రారంభించాలి. అది కూడా ప్రదోష సమయంలో ప్రారంభించాలి. మీకు పూజా విధానం గురించి తెలియకపోతే.. దగ్గర్లోని పండితుల సహాయం తీసుకోవాలి. ఎందుకంటే దీపావళి పూజ చాలా ప్రత్యేకమైనది.