What is tomato fever:‘టమోటా ఫీవర్’ అంటే ఏమిటి? దీని లక్షణాలు, చికిత్స విధానాలేంటో తెలుసుకోండి..

టమోటా ఫీవర్ అంటే?

టమోటా ఫీవర్ నే టమోటా ఫ్లూ అని కూడా పిలుస్తారు. ఇది ఒక వైరల్ ఇన్ఫెక్షన్. ఈ మహమ్మారి ఎక్కువగా చిన్నారుల్లో ప్రభావం చూపుతుంది. ‘టమోటా ఫీవర్' వచ్చిన పిల్లల్లో చర్మంపై ఎర్రటి దద్దుర్లు, బొబ్బలు వస్తున్నాయి. అంతేకాదు చిన్నారులు డీహైడ్రేషన్ గురవుతున్నారు. టమోటా ఫీవర్ అని పేరు రావడానికి ప్రధాన కారణం చర్మంపై వచ్చే బొబ్బలు ఎర్రగా గుండ్రగా ఉండటం, పొక్కులు ఉంటాయి. అవి టమోటాల రూపంలో ఉంటాయని, అందుకే వీటికి ఆ పేరు వచ్చిందని నిపుణులు చెబుతున్నారు.

టమోటా ఫీవర్ లక్షణాలు..

టమోటా ఫీవర్ వచ్చిన చిన్నారులకు జ్వరం ఎక్కువగా ఉంటుంది. వారికి బాడీ పెయిన్స్, కీళ్ల నొప్పులు కూడా పెరుగుతాయి. విపరీతంగా అలసిపోవడం, చర్మంపై ఎర్రటి దద్దుర్లు, కొందరిలో బొబ్బలు రావడం వంటివి జరుగుతాయి. డీహైడ్రేషన్ కారణంగా నోటిలో చికాకుగా ఉంటుంది. చేతులు, మోకాళ్లు, పిరుదుల భాగంలో రంగు మారిపోతుంది.

టమోటా ఫీవర్ వస్తే..

చిన్నారులకు టమోటా ఫీవర్ వస్తే ఏ మాత్రం ఆలస్యం చేయకుండా డాక్టర్ ను సంప్రదించాలి. ఈ ఫీవర్ వచ్చిన వారికి గోరువెచ్చని నీటిని తాగిస్తూ ఉండాలి. ముందుగా డీహైడ్రేషన్ బారి నుండి తప్పించాలి. బొబ్బలు, దద్దుర్లను పిండటం, గోకడం వంటివి చేయరాదు. గోరువెచ్చని నీటితోనే స్నానం చేయించాలి.

తీసుకోవాల్సిన జాగ్రత్తలు..

టమోటా ఫీవర్ ప్రాణాంతకం కాదని, చికిత్స ద్వారా నయం చేయొచ్చని ఆరోగ్య శాఖాధికారులు చెబుతున్నారు. ఈ వైరస్ రాకుండా కొన్ని జాగ్రత్తలు తీసుకోవాలని సూచిస్తున్నారు. మీరు పరిశుభ్రతను పాటిస్తూ.. మీ చిన్నారులను కూడా శుభ్రంగా ఉండేలా చూసుకోవాలి. వైరస్ సోకిన వ్యక్తితో సన్నిహిత సంబంధాన్ని నివారించాలి. వీలైనంత ఎక్కువ కాలం గోరువెచ్చని నీటిని తాగండి. స్నానం చేయడానికి కూడా గోరు వెచ్చని నీటినే వాడండి.