గర్భధారణ సమయంలో గుండెల్లో మంట కలుగజేసే కొన్ని ఆహార పదార్థాలు

• చీజ్

మీకు చీజ్ తినకుండా రోజును గడపడం దుర్భరంగా అనిపించవచ్చు. కానీ, ఇప్పుడు మీరు గర్భవతి కనుక,మీ సౌకర్యం కొరకు చీజ్ ను తినడం మానుకోవాలి. ఇదే సూత్రం మీరు తీసుకునే అధిక కొవ్వుతో కూడిన ఆహారపదార్ధాలకు కూడా వర్తిస్తుంది.

ఇదే కారణం చేత, గర్భధారణ సమయంలో, అవకాడో మరియు నట్స్ తినవద్దంటారు. ఇవి మీ కడుపును అంత త్వరగా ఖాళీ కానివ్వవు. అందుచేత, మీ కడుపు మీద ఒత్తిడి అధికంగా పడి, ఆమ్లాలు అన్నవాహిక ఎగదన్నడం వలన గుండెల్లో మంట అధికంగా కలుగుతుంది.

• కాఫీ మరియు సోడా

గర్భధారణ సమయంలో కెఫిన్ కలిగివున్న పానీయాలు లేదా సోడా సేవించడం అనేది మంచి ఆలోచన కాదు. వీలు కుదిరితే, ఈ సమయంలో మీకు నచ్చిన పానీయల్లో, కెఫిన్ తొలగింపబడిన రకాలను సేవించే ప్రయత్నం చేయండి.ఏదైనా అనివార్య కారణం వలన మీరు కాఫీ తాగవలసి వస్తే, పరగడుపున తాగకుండా జాగ్రత్త వహించండి. ఎట్టి పరిస్థితుల్లోనూ సోడా తాగకండి. గుండె మంటను నియంత్రించాలంటే, ఈ మాత్రం జాగ్రత్తలు తీసుకోవడం అవసరం.

• బీఫ్

బీఫ్ లో కొవ్వులు అధికంగా ఉండటం మూలాన గర్భం ధరించిన వారి గుండెల్లో మంట కలుగజేస్తుంది. కనుక బీఫ్ తినకపోవడమే మంచిది.మీరు కనుక బీఫ్ తినడం తప్పనిసరి అయితే కనుక లేతగా ఉండే కొవ్వులేని మాంసం భుజించండి. ఇవి మీ అసౌకర్యాన్ని తగ్గిస్తాయి.

• చాక్లెట్

గర్భవతులు చాక్లెట్ తినకూడదనడానికి వివిధ కారణాలు ఉన్నాయి. మొదటిది, చాక్లెట్లో కెఫిన్ అధికంగా ఉంటుంది. ఇది ఇంతకుముందు మనం చెప్పుకున్నట్టు,అజీర్తి మరియు గుండెల్లో మంట కలుగజేస్తుంది. రెండవది, చాక్లెట్లో థియోబ్రోమిన్ సమృద్ధిగా ఉంటుంది. ఒక రకమైన మిథయిల్ గ్సాంథిన్ అయిన థియోబ్రోమిన్, రిఫ్లక్స్ మరియు గుండెల్లో మంట కలుగజేస్తుంది.

• కారంగా ఉండే ఆహారం

గర్భిణీ స్త్రీలలో గుండెల్లో మంటకు, కారంగా ఉండే ఆహారం తీసుకోవడం ముఖ్య కారణం. మిరియాలు, పచ్చిమిర్చి మరియు క్యాప్సికంలను పచ్చిగా తినరాదు. ఇవి గుండెల్లో మంట కలిగేట్టు చేస్తాయి.మీకు కనుక కారంగా ఉండే ఆహారపదార్ధాలు తినాలనే కోరిక తెగ ఎక్కువగా ఉంటే కనుక కొద్ది మొత్తాల్లో తినండి.

• ప్రాసెస్డ్ మరియు బేక్డ్ ఆహార పదార్థాలు

మార్కెట్ లో లభించే బేక్డ్ ఆహార పదార్థాలలో నిల్వ ఉండటానికై వివిధ రసాయనాలు విరివిగా వాడతారు. చూడగానే ఆకర్షణీయమైన విధంగా కనపడటానికి కృత్రిమ రంగులు వాడతారు. ఈ పదార్థాల తయారీ కొరకు ఉపయోగించే మైదా పిండి కోయిదా గర్భిణీ స్త్రీల ఆరోగ్యానికి చేటు చేస్తాయి.

• మద్యం

గర్భధారణ సమయంలో మద్యపానం చేయడం వలన పిండాభివృద్ధి పై ప్రతికూల ప్రభావం పడుతుందని మనందరికీ తెలిసిందే! మద్యపానం మామూలు సమయంలో కూడా మీకు అసౌకర్యం కలిగించడమే కాక, గర్భధారణ సమయంలో గుండెల్లో మంట కలుగజేస్తుంది. కనుక, మీరు గర్భం ధరించారని తెలిసిన మరుక్షణం నుండి మద్యానికి వీలైనంత దూరంగా ఉండటం చాలా తెలివైన పని.

• పెప్పర్మింట్

పెప్పర్మింట్ తినడం వలన అన్నవాహిక మరియు కడుపుకు మధ్య ఉండే సంవరణి కండరము ( sphincter muscle) వ్యాకోచిస్తుంది. గర్భిణీ స్త్రీలలో పొట్ట కండరాలు అప్పటికే వ్యాకోచం చెంది ఉంటాయి కనుక, పొట్టలోని ఆమ్లాలు వెనుకకు ప్రయాణించి, అన్నవాహికలోకి సులువుగా చేరిపోతాయి.

• వెల్లుల్లి

వెల్లులిలో ఫ్రక్టన్స్ అనే పదార్థాలు ఉంటాయి. వీటిని మానవ శరీరం పూర్తిగా జీర్ణం చేయలేక, అజీర్తి కలుగజేస్తుంది. గర్భిణీ స్త్రీలలో అప్పటికే జీర్ణ వ్యవస్థ పై ఒత్తిడి వుంటుంది కనుక వెల్లుల్లిని తింటే గుండెల్లో మంట కలుగుతుంది. కనుక వెల్లుల్లి తినకపోవడమే శ్రేయస్కరం. మీరు గర్భం ధరించక ముందు, మీ శరీరానికి వెల్లుల్లితో ఇబ్బంది లేనప్పటికీ, మీరు గర్భిణిగా ఉన్నప్పుడు అది మీకు సరిపడకపోవచ్చు.