ఆ ప్రేమికులిద్దరూ పెళ్లి గురించి ఎన్నో కలలు కన్నారు... కానీ అంతలోనే...

పెళ్లి గురించి ఎన్నో కలలు..

జపాన్ కు చెందిన లీ హువాయూ, మారుయామా రెండున్నర సంవత్సరాలుగా గాఢంగా ప్రేమించుకున్నారు. వీరిద్దరి ప్రేమ గురించి వారి కుటుంబసభ్యులందరికీ కూడా బాగా తెలుసు. వారి ఇంట్లో తల్లిదండ్రులు వీరి ప్రేమకు ఎలాంటి అభ్యంతరం చెప్పలేదు. దీంతో వారు పెళ్లి గురించి ఎన్నో కలలు కన్నారు.

జీవితంలో స్థిరపడి...

24 ఏళ్ల వయస్సులో ఉన్న వీరిద్దరూ జీవితంలో స్థిరపడిన తర్వాత పెళ్లి చేసుకోవాలని నిర్ణయం కూడా తీసుకున్నారు. ఇంకా కొన్ని రోజుల్లో తమ పెళ్లి జరుగుతుందని సంతోషంగా ఉన్నారు.

తన ప్రేయసికి ప్రమాదం..

వారిద్దరి ప్రేమను చూసి కాలం తట్టుకోలేకపోయింది. అందుకే వారి ప్రేమ కన్నెర్ర జేసింది. లీ ప్రేయసిని ప్రమాదానికి గురి చేసింది. కారు రూపంలో మారుయామాను ఢీకొట్టి తీవ్ర గాయాల పాలు చేసింది. అలా ఆమె ఆసుప్రతిలోకి చేరి కోమాలోకి వెళ్లిపోయింది.

ఆ తర్వాత గతాన్ని మర్చిపోయి..

అయితే ఆమె అదృష్టవశాత్తు కోమా నుండి బయటకు వచ్చింది. అయితే గతం అంతా మర్చిపోయింది. అప్పటివరకు తాను ఎవరో కూడా ఆమెకు గుర్తు లేదు. అది ఎంతలా అంటే అద్దంలో తనను తాను చూసి కూడా గుర్తుపట్టలేనంతగా మరచిపోయింది. ఇక వారి కుటుంబ సభ్యులను, తన ప్రేమికుడిని కూడా ఆమె గుర్తు పట్టలేదు.

ప్రేమికుడి ప్రయత్నం..

తన ప్రియురాలు గతం మరచిపోయిన లీ ఏ మాత్రం అధైర్యపడలేదు. ఆమె తన ప్రేమను మరచిపోయిందేమో.. కానీ నేను తన ప్రేమను మరచిపోలేదు కదా అని అనుకుంటూ ముందడుగు వేశాడు. గతంలో తన ప్రేయసితో గడిపిన మధుర క్షణాలను తలచుకుంటూ, ఆమెకు కూడా తన ప్రేమ గుర్తు చేసేందుకు శాయశక్తులా ప్రయత్నించాడు.

డాక్టర్ల హెచ్చరిక..

ఆమెను ప్రేమ పేరుతో ఎక్కువగా ఇబ్బంది పెడితే తన ప్రాణానికే ప్రమాదం అని డాక్టర్లు హెచ్చరించారు. దీంతో లీ ప్రయత్నాలన్నీ బెడిసి కొట్టాయి. అయితే లీ ఆఖరిగా మరో ప్రయత్నం చేయాలని నిర్ణయించుకున్నాడు.

తన ప్రేయసి మాటలు బాధపెట్టినా...

చాలా సార్లు తన ప్రేయసిని మళ్లీ ప్రేమలో పడేసేందుకు లీ చేసిన ప్రయత్నాలతో ఆమె విసుగు చెందింది. తనని మర్చిపోమని, తన లాంటి వ్యక్తిని పెళ్లి చేసుకుని, లీని సంతోషంగా గడపమని కూడా చెప్పిందట. అయినా ఆ నిజమైన ప్రేమికుడు అందుకు ఒప్పుకోలేదు.

గతం గురించి నాకు తెలుసు..

ఆమెతో ఇలా అన్నాడు. గతం గురించి నీకు తెలియదు ‘‘గతంలో నువ్వు ఎలా ఉండేదానివో నా ఒక్కడికే బాగా తెలుసు. అప్పుడే నేను నిన్ను ఇష్టపడ్డారు. నువ్వు ఇలా ఉన్నా కూడా నాకు ఇష్టమే.. నీ ప్రవర్తన వల్ల నాకు ఎలాంటి ఇబ్బంది లేదు‘‘ అని చెప్పాడట. అయితే మన ఇద్దరం కలసి కొత్త జ్ఞాపకాలను నృష్టించుకోవచ్చు అని చెప్పుకొచ్చాడట.

ప్రతిరోజూ కొత్త పద్ధతి..

అలా తనని ప్రతిరోజూ కొత్త పద్ధతుల ద్వారా ఆకట్టుకునేందుకు.. తనని ప్రేమలో పడేసేందుకు ప్రయత్నించే వాడట. ప్రతిరోజూ ఉదయాన్నే ఆమె గురించి, తన గురించి చెబుతూ తమ ప్రేమ ఎలా మొదలయిందో.. ప్రమాదం జరగక ముందు ఏమేమీ జరిగిందో వివరించేవాడట.

ఆ రోజు రానే వచ్చింది..

ఇలా తనపై నిత్యం ప్రేమ కురిపిస్తున్న ప్రేమికుడి నిజాయితీని మెచ్చుకుని.. ఓ రోజు ఆమె అతనికి ప్రపోజ్ చేయడానికి సిద్ధమైంది. ఇంత ముఖ్యమైన సమయంలో నన్ను విడవకుండా నాతోనే ఉన్నందుకు నీకు ధన్యవాదాలు. నువ్వు నన్ను బాగా అర్తం చేసుకున్నావు. నా మతిమరుపు ఇంకా పెరిగే అవకాశం ఉందని డాక్టర్లు చెప్పినా... అవేమీ పట్టించుకోలేదు. ఇప్పటికీ నేను అన్ని విషయాలు మరచిపోయే అవకాశం ఉంది.

జీవితాంతం తోడుగా ఉంటావా?

అయినా కూడా నువ్వు నాకు జీవితాంతం తోడుగా ఉంటావా అని తన ప్రేయసి అడిగితే.. లీ సంతోషంగా ఇలా సమాధానం ఇచ్చాడు. ‘నీ మతిమరుపు వల్ల నేను మరోసారి నీతో ప్రేమలో పడేందుకు అవకాశం దొరికింది‘‘ అని అన్నాడు. అందుకు స్పందించిన మారుయామా ‘‘అమ్నీషియా వల్ల నేను మరోసారి తన ప్రేమలో పడేందుకు అవకాశం దొరికింది. నేను ఎన్నిసార్లు గతం మర్చిపోయినా లీ నన్ను వదలడు. నన్ను తనతో మళ్లీ మళ్లీ ప్రేమలో పడేలా చేసుకుంటాడనే పూర్తి నమ్మకం నాకు ఉంది‘ అంటూ తన ప్రియుడి గురించి గర్వంగా చెప్పింది.

ప్రేమికులందరికీ స్ఫూర్తిదాయకం..

నిజమైన ప్రేమికులందరికీ ఈ ప్రేమ స్ఫూర్తిదాయకంగా నిలిచింది. దీన్ని బట్టి నిజమైన ప్రేమకు ఎల్లప్పుడూ మతిమరుపు అనేదే ఉండదు అని చెప్పొచ్చు.