ఇండియాలో ఇప్పటికీ ఈ వింత మూఢ నమ్మకాలు.. వింటే ఆశ్చర్యపోతారు...!

అలా ఎదురైతే..

మనలో ఎవరైనా బయటికి వెళ్లేటప్పుడు మెడలో తాళిబొట్టు.. నుదుటిన నిండుగా కుంకుమ బొట్టు.. కాలికి మెట్టు.. ముత్తైదువులా చీర కట్టుకుని ఎవరైనా మహిళ ఎదురైతే.. ఆ సమయాన్ని శుభ శకునంగా భావిస్తారు. అయితే పొరపాటున ఎవరైనా విధవ(భర్త చనిపోయిన) మహిళ ఎదురైతే దాన్ని అశుభానికి సంకేతంగా భావిస్తారు. గుండు (శిరోముండనం)చేయించుకున్న వ్యక్తి ఎదురైతే కూడా అశుభంగా పరిగణిస్తారు. అలాగే పిల్లి ఎదురైనా.. అది మన దారికి అడ్డంగా నడిచినా కూడా అశుభానికి సంకేతంగా భావిస్తారు.

బ్రాహ్మణులు జంటగా..

మరి కొన్ని సందర్భాల్లో మంచి నీటి బిందె, పాల బిందె, పెరుగు పాత్రలు, కల్లు కుండలో మోసుకుని వచ్చే వారు, వేశ్యలు, చాకలి వారు, చెరకు కట్టను మోసుకెళ్లే వారు, జంటగా వెళ్లే బ్రాహ్మాణులు ఎదరైతే ఆ సమయాన్ని శుభ శకునంగా భావిస్తారు. అయితే ఒంటరిగా వచ్చే బ్రాహ్మణుడు ఎదురైతే దాన్ని అశుభకరంగా భావిస్తారు.

కుడివైపున వెళితే..

వాస్తు శాస్త్రం ప్రకారం, మనం ఏదైనా శుభకార్యం నిమిత్తం బయటకు వెళ్తున్నప్పుడు.. ఆవు, జింక, ఉడుత, కోడి, చిలువక, కొంగ, కుందేలు, నక్క, గద్ద వంటి పశుపక్ష్యాదులు మీకు కుడివైపు నుండి వెళ్లాయంటే దాన్ని శుభప్రదంగా భావించొచ్చు. అలాగే పక్షుల జంటలను చూస్తే కూడా శుభకరంగా ఉంటుందట.

నాయిబ్రాహ్మణులు ఎదురైతే..

హిందూ సంప్రదాయం ప్రకారం, మనం బయటకు వెళ్లే సమయంలో మంగళివారు(నాయి బ్రహ్మాణులు)తమ సామాగ్రితో ఎదురుపడితే దాన్ని కూడా శుభప్రదంగా భావిస్తారు. అయితే మంగళవారం రోజున ఇప్పటికీ మన దేశంలో కటింగ్, షేవింగ్ వంటివి చేసుకోరు. అలాగే తాము పుట్టినరోజున క్షవరం వంటివి చేసుకోకూడదని పెద్దలు చెబుతుంటారు. అంతేకాదు ఆరోజున గోళ్లను కూడా కత్తిరించకూడదట.

గుమ్మంలో తుమ్మితే..

హిందూ సంప్రదాయం ప్రకారం, ఇంట్లో ప్రవేశ ద్వారం(గుమ్మం) మీద నిలబడి తుమ్మితే దాన్ని అశుభంగా భావిస్తారు. ఈ సమయంలో ఏదైనా కీడు జరుగుతుందని చాలా మంది ఇప్పటికీ నమ్ముతారు. అయితే దీనికి నివారణగా కొందరు కొన్ని మంచినీళ్లను తెచ్చి మన నెత్తి మీద చల్లుతారు. మరి కొందరు అదే గడప మీద నిలబడి పసుపు నీటిని చల్లుకోమని పెద్దలు చెబుతారు.

అవి అరిస్తే..

మన ఇళ్లలో.. లేదా కార్యాలయాల్లో బల్లి అరిస్తే దాన్ని అశుభంగా భావిస్తారు. అలాగే మన ఇంటి బయట కాకి తరచుగా అరుస్తూ ఉంటే.. ఆ సమయంలో మన ఇంటికి ఎవరైనా బంధువులు వస్తున్నారని.. అందుకే సంకేతంగా ఈ కాకి అరుస్తుందని భావిస్తారు. మరోవైపు ఎవరైనా తమ ఇంట్లో శునకాన్ని పెంచుకుంటే.. అది మనం బయటకు వెళ్లేటప్పుడు తుమ్మితే ఆ సమయాన్ని శుభప్రదంగా భావిస్తారు.