వినాయక నిమజ్జనం సమయంలో కరోనా రాకుండా తీసుకోవాల్సిన జాగ్రత్తలివే...!

మాస్క్, శానిటైజర్ తప్పనిసరి..

ఈసారి గణేష్ నిమజ్జనం ఉత్సవంలో పాల్గొనే ప్రతి ఒక్కరూ ముఖానికి మాస్కును తప్పనిసరిగా ధరించాలి. అలాగే శానిటైజర్ ను ప్రతి రెండు లేదా మూడు గంటలకోసారి చేతులకు రాసుకోవాలి.

భౌతిక దూరం మరవొద్దు..

గణేష్ నిమజ్జన ఉత్సవాల్లో అసలైన విషయం ఇదే. ఈ ఉత్సవాల సందర్భంగా డీజే పాటలు లేదా డ్రమ్స్ పెట్టి ప్రతి ఒక్కరూ సామూహికంగా కలిసి డ్యాన్సులు వేస్తూ.. ఈ వేడుకల్లో ఉత్సాహంగా పాల్గొంటారు. కానీ ఈసారి ఇలాంటి వాటిని జరుపుకోవాల్సిన పరిస్థితి కనబడటం లేదు. అలాగే మీరు కచ్చితంగా భౌతిక దూరం పాటించాలి.

నలుగురు మాత్రమే..

సాధారణంగా గణేష్ నిమజ్జనం సమయంలో జరిపే ఊరేగింపులో పదుల సంఖ్యలో లేదా వందలాది మంది ప్రజలు రోడ్లపై గుమిగూడి ఉంటారు. అలాగే వాహనాలలో కూడా పదుల సంఖ్యలో వ్యక్తులు ఉంటారు. కానీ ఈసారి మాత్రం గణేశుని ఊరేగింపు సమయంలో కేవలం నలుగురు లేదా ఐదుగురు కంటే ఎక్కువ ఉండకుండా చూసుకోవాలి.

టపాసులు కాల్చకండి..

ప్రతి ఏడాది గణేష్ నిమజ్జనం సందర్భంగా, టపాసులు కాలుస్తూ సంబరాలు జరుపుకుంటూ ఉంటారు. అయితే ఈ ఏడాది దీనికి అవకాశం లేదు. పోలీసులు కూడా బాణసంచా కాల్చడానికి అనుమతి ఇవ్వలేదు. కాబట్టి ముందుగానే బాణసంచా కొనడం వంటివి చేయకండి. ఒకవేళ వాటిని కొంటే ఇతర సమయాల్లో ఉపయోగించుకోండి.

నీటిలో దిగే సమయంలో..

వినాయక విగ్రహాలను తీసుకునే నీటిలోకి దిగే సమయంలో కాలువలు, చెరువులు, నదులు, సముద్రాల వద్ద కేవలం ఈత వచ్చినవారే వెళ్లండి. ఈత వచ్చిన వారు కూడా ఎక్కువ లోతు మరియు దూరం వెళ్లకండి. ఎందుకంటే ప్రస్తుతం వర్షాకాలం కాబట్టి కాలువల్లో, నదుల్లో నీటి ప్రవాహం వేగంగా ఉంటుంది. ఇప్పటికే చాలా చోట్ల భారీ వర్షాలు కూడా పడ్డాయి. డ్యాములన్నీ నిండిపోయాయి. అన్ని కాలువలకు నీటిని విడుదల చేశారు.

సాయంత్రం లోపు..

సాధారణంగా వినాయక నిమజ్జనం అంటే కొందరు రాత్రి వేళలో లేదా సాయంకాలం పూట ఊరేగింపు కార్యక్రమాలను నిర్వహిస్తుంటారు. కానీ ఇప్పుడు కరోనా వంటి మహమ్మారి ఉంది కాబట్టి.. లాక్ డౌన్ కూడా ఉన్నందున వినాయక ఊరేగింపును సాధ్యమైనంత మేరకు చీకటి పడేలోపు ముగించుకోవాలి.