సౌకర్యవంతమైన బెడ్ రూమ్ కి బెడ్ సెలక్షన్ ఎలా ఉండాలి..?

Decor

oi-Saraswathi

By Sindhu

| Published: Saturday, January 28, 2012, 13:19 [IST]

ఇంటి అలకరణ విషయంలో ఒక్కో రూం కి ఒక్కో ప్రాధాన్యత ఉంటుంది. హాలు, లివింగ్ రూం, దేవుడు గది, వంటగది, పడకగది..వీటిలో ఇట్లో వారి ఇష్టాఇష్టాలకు తగినవిధంగా అలంకరించుకొంటారు. అలా కాకుండా కొంచెం కళాత్మకంగా అలంకరించినట్లైతే ఇల్లు చూడటానికి చాలా అందంగా, ఎప్పుడూ కొత్తదనంతో మెరిసిపోతుంది. పడకగది అలంకరణలో ఇష్టాఇష్టాలకు అభిరుచులకు ప్రాధాన్యత ఇవ్వటంకంటే మానసిక ఉపశమనానికి ప్రాధాన్యం ఇచ్చేలా ఉండాలి. గోడల రంగులు, తలుపులకు వేసే కర్టెన్లు, కిటికీలకు వేసే కర్టెన్లు లాంటివి కంటికి భారంగా కనిపించకుండా..గదిలోకి వెళ్లగానే మనసుకు ఉపశమనం కలిగించేలా అమర్చుకోవాలి. ఇంటీరియర్స్‌ లో బెడ్‌ రూమ్‌ ను అందంగా చూపించేవి బెడ్స్. మరి పెద్దలకు, పిల్లలకు కామన్‌ గా బెడ్స్‌ని డిజైన్ చేస్తే ఏం బాగుంటుంది? కొంచెం కొత్తగా, గది ఆకారాన్ని బట్టి వాటిని డిజైన్ చేయాలి.

మాస్టర్ బెడ్‌రూమ్: బెడ్‌ లను ఎంచుకునే ముందు గది కొలతలు, థీమ్‌ ని దృష్టిలో పెట్టుకోవాలి. గది విశాలంగా ఉంటే.. కింగ్ సైజ్ బెడ్‌ ని సెలక్ట్ చేసుకోవచ్చు. అపార్ట్‌ మెంట్‌ ల కారణంగా ఇప్పుడు ఈ గదులు కొంచెం చిన్నగానే ఉంటున్నాయి. వాటికి తగ్గట్టు బెడ్స్‌ ను ఎంచుకోవాలి. ఈ చిన్న గదుల్లో అన్ని వస్తువులను సర్దడం చాలా కష్టం. స్టోరేజ్ కోసం బెడ్ కింద పుల్‌ అవుట్‌ లు వస్తాయి. అంటే సొరుగులలాగా ఉంటాయన్నమాట. వీటిలో బెడ్‌షీట్‌లు, మెత్తలను, ఇంకేవైనా సామాన్లను సర్దేయొచ్చు. ఈ బెడ్ హెడ్ బోర్డ్‌ లకు లెదర్ ఉపయోగిస్తే బాగుంటుంది. ఎందుకంటే.. కూర్చొని చదువుకోవడానికి అనువుగా ఉంటుంది.

గెస్ట్ రూమ్: ఈ గదిలో సింగిల్ బెడ్ వేస్తే సరిపోతుంది. ఒకవేళ చుట్టాలు ఎక్కువ వస్తారనుకుంటే పుల్ అవుట్ బెడ్ ఎంచుకోవాలి. సోఫా కమ్ బెడ్ తీసుకుంటే మరీ మంచిది.

చిల్డ్రన్స్ రూమ్: సంతానం ఒక్కరే అయితే సింగిల్ బెడ్ వేసుకుంటే సరిపోతుంది. ఇద్దరు, ముగ్గురు ఉంటే మాత్రం బంకర్ బెడ్స్‌ ని ఎంచుకోవాలి. దీనివల్ల స్థలం కూడా కలిసి వస్తుంది. అయితే ఇవి కూడా పలు ఆకారాల్లో దొరుకుతాయి. అబ్బాయిలకు అయితే కారు, జీపు షేపుల్లో, అమ్మాయిలకైతే.. పువ్వుల ఆకారంలో ఉన్న బెడ్స్ ఎంచుకుంటే వాళ్లు కూడా కొత్తదనంగా ఫీలవుతారు.