ఆహా ఏమి రుచి..వేడి వేడి చికెన్ లెగ్ సూప్..టేస్ట్ చూస్తే వావ్ అనాల్సిందే

నాన్ వెజ్ ప్రియులకు చికెన్ అంటే ఎంత ఇష్టమో ప్రత్యేకంగా చెప్పనక్కర్లేదు. చికెన్ కర్రీ, ఫ్రై, బిర్యానీ వంటి ఎన్నో రకాల వంటకాలను మనం తరచూ ఆస్వాదిస్తుంటాం. అయితే రుచితో పాటు అపారమైన ఆరోగ్యాన్ని ఇచ్చే వంటకం ఏదైనా ఉందంటే అది చికెన్ సూప్ మాత్రమే.

సాధారణ చికెన్ సూప్ కంటే చికెన్ లెగ్ సూప్ ఆరోగ్యానికి సంజీవని లాంటిది. ఇందులో ఉండే పోషకాలు, మసాలాలు మన శరీరానికి ఎంతో మేలు చేస్తాయి. కోడి కాళ్ళను ఉడికించడం వల్ల అందులో నుండి కాల్షియం, మెగ్నీషియం, పొటాషియం, ఫాస్పరస్ వంటి ముఖ్యమైన మినరల్స్ సూప్‌ లోకి విడుదలవుతాయి. ఇవి మన ఎముకలను దృఢంగా ఉంచడంలో సహాయపడతాయి. జలుబు, దగ్గు, గొంతు నొప్పి వంటి సమస్యలకు ఇది చక్కటి ఔషధం. చికెన్‌ లో ఉండే విటమిన్ B6 గుండె ఆరోగ్యానికి మంచిది, జీర్ణశక్తిని మెరుగుపరుస్తుంది.

కావలసిన పదార్థాలు
కోడి కాళ్ళు: 4-5 (చర్మం లేనివి, శుభ్రంగా కడిగినవి)
అల్లం వెల్లుల్లి పేస్ట్: 1 టీస్పూన్
టమాటో: 1
పచ్చిమిర్చి: 2
మిరియాల పొడి: అర టీస్పూన్
జీలకర్ర పొడి: అర టీస్పూన్
గరం మసాలా: అర టీస్పూన్
పసుపు: చిటికెడు
ఉప్పు: రుచికి సరిపడా
కొత్తిమీర, పుదీనా: గుప్పెడు
నీళ్లు: తగినన్ని

తయారీ విధానం

-ముందుగా కోడి కాళ్ళను పసుపు, ఉప్పు వేసి శుభ్రంగా కడగాలి. సూప్ కోసం ఎప్పుడూ చర్మం లేని కాళ్ళను వాడటం మంచిది.

-ఒక ప్రెజర్ కుక్కర్ తీసుకుని అందులో శుభ్రం చేసిన కోడి కాళ్ళను వేయండి.

-ఇప్పుడు కుక్కర్ లోనే తరిగిన టమాటో ముక్కలు, పచ్చిమిర్చి, అల్లం వెల్లుల్లి పేస్ట్, పసుపు, కారం, గరం మసాలా, జీలకర్ర పొడి, మిరియాల పొడి, రుచికి సరిపడా ఉప్పు వేయాలి. ముక్కలు మునిగేలా తగినన్ని నీళ్లు పోసి, కుక్కర్ మూత పెట్టి మీడియం మంటపై ఉంచాలి.

-కోడి కాళ్ళు గట్టిగా ఉంటాయి కాబట్టి సారం మొత్తం నీటిలోకి దిగడానికి కనీసం 4 నుండి 5 విజిల్స్ వచ్చే వరకు బాగా ఉడికించాలి.

-ప్రెజర్ పోయిన తర్వాత మూత తీసి చూడండి. సూప్ మరుగుతుండగా సన్నగా తరిగిన కొత్తిమీర, పుదీనా ఆకులను వేసి మరో 3-4 నిమిషాలు సన్నని మంటపై మరిగించండి.

-అంతే ఘాటైన, రుచికరమైన చికెన్ లెగ్ సూప్ రెడీ. దీనిని బౌల్‌లోకి తీసుకుని వేడివేడిగా సర్వ్ చేయండి.

-జలుబు చేసినప్పుడు లేదా వర్షం పడుతున్నప్పుడు ఈ సూప్ తాగితే గొంతుకు, కడుపుకు ఎంతో హాయిగా ఉంటుంది.